زيادة مورا زيادة ليك الله يامسكين…الدرويش فين بقا يعيش.

Tarik Habib23 يونيو 2024109 عدد المشاهدات مشاهدةآخر تحديث :
زيادة مورا زيادة ليك الله يامسكين…الدرويش فين بقا يعيش.

أخبار الشعب / طارق حبيب

بصفتي مواطن مغربي كانعيش بين أبناء الشعب وأنا واحد منهم ، ديما كانتساءل…

في ظل هاد الغلاء واش المسكين ما عندوش بلاصة ؟ واش المسكين ما كانضربوش ليه الحساب ؟ وشكون غادي يضرب ليه الحساب ؟ كي غادي يعيش الدرويش في هاد الظروف ؟

مابين الكراء…الماء والضوء…المدرسة…وزادوها بالغلاء ، وزيد وزيد .

غادي تسولوني علاش كا تهضر بالضبط ؟

غادي نقول ليكم على بزاااف ديال الحوايج ؛ ما نمشيوش بعيد نبداوا غير بعيد الأضحى اللي يالاه فات ، كلنا شفنا غلاء الأضاحي ، كلنا شفنا رجال بكاوا حيت ما قدروش يدخلوا الفرحة على وليداتهم فهاد العيد ؛ ماشي حيت هما اختاروا ما يشريوش ، ولكن حيت جهد الدرويش ماكاينش فالسوق .

نزيدكم ، شفنا البوطة هي اللخرة زادت فالثمن ، أودي ؛ كيفاش الدرويش كايتقاتل باش يكمل الشهر ، وكا يضرب ألف حساب ، ونجيوا حنا نزلوا عليه بالزيادة ، غير قولوا ليا آش هذا ؟؟

البارح وأنا غادي نسول على ثمن الخضر والفواكه فسوق أسبوعي وسمعت شي أثمنة خلاوني نتستاءل أش بيد الدرويش ما يدير ، أشنوا الحل ؟ هادشي فين غادي بينا ؟ زيادة مورا زيادة ؟ ياريت كون كانت الزايدات غير فالحاجات الثانوية ، ولكن فاش كا نهضروا على الخضر ، الفواكه ، البوطة ، راه ما بقى ما يعجب ، وما بقا لينا ما نقولوا من غير لا حول ولا قوة إلا بالله العلي العظيم.

ولينا خايفيين غير غدا يقول لك راه زادوا فالعدس واللوبيا ، أو زادوا فالطحين ، هنا غادي نقولو ليك الله يا مسكين…

نمشيوا دابا نهضروا على البنزين اللي حتى هو تزاد ، وراكم عارفين مللي كانقولو البنزين تزاد ، راه كلشي كايتزاد ، وخصوصا الطاكسي ، فتصوروا معايا إنسان كايخدم على قدوا ، نزيدوا ليه حتى فوسيلة النقل ديالو ، بحالا كانقولو ليه ما عندك لا نقل لا أكل ، كا نهضروا حتى نعياوا ونقولوا فاللَّخر الله يشوف من حال المسكين ، ولهلا يحاشم أي رجل مع وليداتوا ، والله يكون مع أي رب أسرة فهاد الظروف ، ماشي ساهل والله ما ساهل ، ولكن ما يحس بالموزود غير المخبوط بيه ، والمسكين ما كاين اللي يفكر ليه ، إوى راه كلشي فايت هادي غير دنيا ، شوفوا قدام الله أش تقولوا…

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

اخبار عاجلة

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق