صدى الكلمات .. مقهور عالوطن المقهور

CHIOUI Mohammed16 يناير 2023118 عدد المشاهدات مشاهدةآخر تحديث : الإثنين 16 يناير 2023 - 3:44 مساءً
CHIOUI Mohammed
أقلام حرة
صدى الكلمات .. مقهور عالوطن المقهور

الشعب .. صديقكم خالد بركات

إذا أرهقتك طباع البشر
ومسّكٓ فيها عظيمُ الضَرَر
وذُقت الأَمَرَينِ حتى بكيت
وضّجَ فؤادك حتى انفجر
وسُدت بوجهك كل الدروب
وأوشكت على السقوط بين الحُفَر
فسارع الى الله بلهفةٍ
وصلّي وسبِّح قبل السحر
لقائلها..

أكثر الكلمات وجعاً كتبت، الواقع قتل الأحلام..
هي تمثل حال ٩٠% من شباب وصبايا الوطن..
مقهور.. عالوطن المقهور، عاعيشة مواطنينه..

مقهور، عا راجع عا بيته مشي ، كان كل النهار عمبيرم عا شغل وما معو أجار الطريق، وحدا بسذاجة بيسألو لي ما بتشتغل..؟؟
بيضحك من الحسرة، وبيحكي لحالوا ،عا أساس انو الشغل مقتل بعضه، وانا ما بد اشتغل..

مقهور، عا الشب يلي بيصير عمره فوق 28 سنة ولمن تسألوا مش ناوي تتزوج..؟؟
وبيتطلع فيك وبيبتسم بسمة خجولة، وبيجاوبك بحرقة قلب مع تنهيدة وبيقلك ربنا بيفرجها..

مقهور، عالشب لما يطلع من بيت أهله وما معو بجيبته ولا ليرة، فكرو لما يطلع من البيت يخفف الهم اللي عليه بس يطلع بيرجع بيحكي يا ريتني ما طلعت لانو بختنق أكثر وأكثر..

مقهور، عالصبية اللي بيصير عمرها 30 سنة معلمة ومهذبة وأهلها محترمين، وما في حدا بيتقدملها، والناس بحشرية بيسألوا ليش..؟؟!!
لإنوا نسيوا أنو الشباب طفرانة من قلة الشغل
والبنت بتطلع تشتغل من الصبح للمسا، كرمال بيها ما معو يصرف عليها وكرمال ما تحتاج حدا وما رح تتزوج لانو اهلها محتاجين مصاري..

مقهور، على الشب اللي بيضل نايم لبعد الظهر، كرمال يهرب من الواقع اللئيم، ومن أهله كرمال ما يسمع كلمة روح اشتغل..
مقهور، عالبي الما بينتبه وهو بيحكي لابنه روح اشتغل، لما كنت بعمرك كنت متزوج واشتغل أكتر من شغلة، اللي متلك متزوج وعندو سيارة..
وبيجاوبوا بغصة وبرجفة شفايف تنطق كلام..
طيب يا بيي ما انت شايف الوضع بروح بسرق.؟
ما انت ربيتنا عالقمة الحلال من عرق الجبين
ما أيام زمان كان في بركة وخير وكان في….!!

مقهور، عالعيلة لولادها بالغربة كانوا يقولوهم اشتقنا ايمتي جايين، صاروا يقلولهم ما تجوا
عالقهر والتعتير، وبدل ما كانوا يقلولهم الحمدلله هون مرتاحين وما تبعتوا شي ،صاروا يقولولون، بعتولنا مصاري ودوا وكل شي لنعيش..

مقهور، عالأب اللي أولادو تخرجو من الجامعات وبدهم يساندوه وأولاده مش لاقيين شغل وإذا اشتغلوا براتب بمليون ليرة أو أقل..
طيب شو بدها تكفيهم مواصلات ولا دخان ولا تياب ولا أكل ولا انترنت ولا تلفون ولا شوو..؟؟!!
وهيدا اذا كان عمبيقبض بوقتها ومش مكسور على قبض شهرين أو يمكن أكثر..
طيب ايمتى بدو يجمع مصاري ويساعد أهلو
ويفكر يتجوز وإذا تجوز كيف بدو يصرف..!!؟؟
وإذا تزوج بيقولوا شو صاير عليك، ولما بيتزوج بيقولولوا جيب ولد، ما الولد بيجي الولد وبتجي رزقتوا معوا، ما تيسترزق بيوا بالأول ،والولد الي بيخلق جايي وعليه ديون، وخلقان وجايب معو كمبيالات مستحقة عا بيو من ديون عالوطن..

مقهور، على الأم لمن جارتها تسألها ايمتى ناوية تزوجي ابنك، وتجيبي كنة وتشوفوا الأحفاد..؟؟
والأم تتنهد مع كمية وجع وترد عليها الله كريم
بيفرجها وبزوجو أحسن بنت وتفرحي من ولادك..
وبتكون الجارة صرلها ساعة تقول شو مكسور عليهم ديون ، وبتقول نحنا زمطنا وتزوجنا..

‏لو قلوب الناس عبعضها متل ما عيونها على بعضها كانت الدنيا بألف خير وأنتم بألف خير..
مقهور وبقول : يا رب فرجها علينا ما النا غيرك..

اترك تعليق

لن يتم نشر عنوان بريدك الإلكتروني.


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.

الاخبار العاجلة

نستخدم ملفات الكوكيز لنسهل عليك استخدام موقعنا الإلكتروني ونكيف المحتوى والإعلانات وفقا لمتطلباتك واحتياجاتك الخاصة، لتوفير ميزات وسائل التواصل الاجتماعية ولتحليل حركة الزيارات لدينا...لمعرفة المزيد

موافق