أخبار الشعب /
خوك ماشي فالحالة المدنية،
وخوك ماشي غير فالسمية…
خوك اللي يشد فيك فالشدة،
ماشي اللي يضحك وانت فالمحن مدّة.
خوك اللي يوقف ويقول:
“أنا معاك، ما نخليك”،
ماشي اللي يشوفك طايح،
ويقول: “خليه، أنا مالي بيه؟”
خوك اللي يسمع الكلام عليك،
ويصد ويقول: “ماشي صحيح”،
ماشي اللي يهز الراس ويضحك،
ويسقي سمّ العيب في الريح…
خوك اللي يعرف معنى الأخوّة،
يعرف الخبز لي تكسّر بينك وبينه،
ويعرف دموعك شحال من مرة بلّلو عينه،
خوك ماشي صورة فتليفون،
ولا حضن موسمي يجي ويخون…
الأخوّة ماشي قرايب الدم،
الأخوّة هي القلب اللي ما يهم،
إذا غلطت… ينبهك،
وإذا بكيت… يضمّك،
وإذا سكت… يفهمك،
وإذا تعريت… يسترك ما يفضحك!
خوك اللي يحاول يصلحك،
ماشي اللي يفضحك بين الناس،
خوك اللي يحس بك،
ماشي اللي يحكم عليك من لباس…
الأخوة فهاد الزمان ولات عملة نادرة،
بزاف خوت كيشوفو فالمادة العز والقدرة،
ينساك إلى فرغت الجيبة،
ويدوّر وجهو وقت المصيبة…
آه يا زمن الأخوة الباهتة،
فين خوت القلوب الصافية،
فين اللي كانو السند،
فين اللي كانو النور فالعتمة والبرد؟
خوك ماشي لي تْكتب فدفتر الحالة،
خوك اللي يحس بيك بلا ما تهضر،
ويجمعك من الضياع،
وما يرضاش بك تولّي خبر…
توقيع: محمد شيوي
من قلب الحرف، للّي مازال كيلقى خوت ما تبدلهم كنوز الدنيا.
مراكش | 18 يونيو 2025
