أخبار الشعب / طارق حبيب
قالك أسيدي إلى بغيتي شي خدمة أو وثيقة إدارية في هاذ الزمان خصك تجمع كل الأوراق و الشواهد اللي غادي تحتاج ، منين كا نقول ليك كلشي يعني كلشي ، ولكن راه واخا تجمع لي جمعتي كاينين وثائق ضرورية هما لي واقف عليهم الغرض ديالك ، راك عارف 😉 ضروري من الأوراق النقدية ( الفلوس)
أنا بغيت غير نعرف واش داك الموظف اللي كايطلب قهيوة ، واش ما عندوا كرامة ؟ ما عندو روح المسؤولية؟ ما عندو غيرة على بلادوا ؟ ما كا يفكرش فأولادوا اللِّي غادي يدخل عليهم فلوس الحرام ؟ وزيد وزيد ….
أنا بعدا كا يضرني خاطري ، فاش كا نشوف مواطن ، على قد الحال ، خدمتوا متواضعة ، وكا يجيب طرف الخبز من فم السبع ، والوقت اللي يجي يبغي غير وثيقة أو خدمة إدارية ، اللِّي هي حقوا كمواطن أنه يستافد منها ؛ كا يشوف ويعيش مشاهد يَحْزَنْ عْلِيهَا القلب :
نبداو بالمعاملة ؛ كانحسوا براسنا بحالا جينا كمتسولين لدوك الموظفين ، أو أن الخدمة اللي غادي يقدموا مبلغها غالي ل يستحقهاش الدرويش أو بالأحرى ولد الشعب ، كلام نابي ، معاملة غير أخلاقية ، تصغير بالمواطن وزيد وزيد…
لا ولكن بلاتي ! إلى عندك شي واحد كا تعرفوا خدام فشي إدارة ، أو عندك معرفة بصفة عامة ، غير سير مْهَنِّي ، غَرَاضك مقضي ، واخا تمشي أنت اللَّخر غادي تسالي انت الأول في إطار بَّاك صاحبي ، أو صفطني عندك فلان !
وحتى إلى ما عندكش معرفة ، راه عندك الفلوس ، كا نقصد القهيوة، اللي هما وثائق ولات ضرورية في كل غرض إداري ، وبلا بيها مِلفك ناقص ، سير شهر وعاود جي ، ولكن نصحك حتى إلى مشيتي شهر وجيتي بلا بيها مِلَفَّك غادي يبقى ناقص ، إوى غير جيبيها وتهنى ! للأسف 🥲
حنا لا نعمم لأن التعميم لغة الجهلاء ، وماشي كلشي بحال بحال ، حيث مازال كاين الخير فالبلاد ، كاينين ناس عندهم روح المسؤولية ، روح المواطنة ، ناس عارفين لي ليهم ولي عليهم 🙏
دابا جا الوقت باش نقولوا لا ، لا للرشوة ، الخدمة الإدارية حقنا كمواطنين أننا نستافدوا منها في الإطار قانوني ، وكل موظف هو فخدمتنا ، وهو كا يتخلص على الوظيفة ديالوا ، وهاذاد الشيء كافي يخلينا نطالبوا بحقوقنا ، حنا ما طلبنا والو ، بغينا غير نحصلوا على حقوقنا بشكل قانوني ، وحتى إلى درنا علاش أو محتارمناش أي موظف نتحاسبوا ولكن فالمقابل إلى أي موظف قلل من كرامتنا كمواطنين ياخد أشد العقاب
أين هي الإنسانية ؟ منين تكون أنت موظف عندك منصب مهم ، وتطمع في فلوس ولد الشعب ، لي ربما مياوم ، كا يكمل الشهر بالتضحيات ، كيفاش تقبل على خوك المسلم هاذ العذاب ، ديما نحطوا راسنا فمكان الآخر ونحسوا بيه حيت في النهاية راه كلنا واحد 🙏
واليوم جا دورنا كمواطنين باش نقولوا لا للرشوة ، صحيح أنها كا ضرنا وأننا حنا ضحية ديالها ، ولكن السكوت عليها كافي باش نوليوا طرف من هاد الجريمة ، صافي باركة ، جا وقتك باش تهضر فحدود الحقوق ديالك ، جا وقتك باش تبلغ على الرشوة وتقول لا ، جا وقتك باش تمشي للإدارات العمومية وانت كلك ثقة بلِّي الغرض اللي غادي عليه ما دام قانوني فهو حقك والموظف من واجبوا يأديه لأنه كا يتخلص عليه ، كيف ما الطبيب من واجبوا إنقاد المريض ، و الأستاذ من واجبوا التعليم …..
وما نساوش بلادنا بلاد الحق والقانون ، ومغربنا مازال فيه الخير واجب علينا كلنا نكونوا يد وحدة وأقل حاجة هي :
الخط المباشر للتبليغ عن الفساد والرشوة.
ALLO 0537718888 ☎️
