أخبار الشعب / هشام
ما الحل ؟
كانسمعوا على حالات تسمم هنا ولهيه… والسبب في الغالب راجع لإفتقار بعض المطاعم لأبسط شروط السلامة الصحية.
و الأبشع من هادشي ، بعض أرباب المطاعم مازال كايتعاملو بمصطلح باك صاحبي أو بما يسمى بالزبونية ..
والمثال لكل هادشي اللي ذكرناه ، هو مطعم متواجد بمدينة طنجة بمنطقة دار التونسي…
قال ليك آسيدي مختص بتقديم أطباق الأسماك الطرية…
مع الأسف فين هي الطراوة…
الزبناء براسهم لاحظوا وصوروا كيفاش كاتنقل الأسماك للمطعم فظروف غير صحية…
السؤال المطروح هو حتى لين غادي نبقاوا ساكتين على هذا الوضع ، واش حتى توقع شي كارثة لقدر الله عاد نفتحوا تحقيق
الأسماك كاتنقل للمطعم بكروسة ، وطبعا هادي فحد ذاتها كارثة ومهزلة كانعيشوها ، خصوصا منين كا نتكلموا على مطعم بمدينة طنجة ، هذي آسيدي راه طنجة.. عروس الشمال..و بوابة المغرب من الجهة الأوروبية، مدينة سياحية بامتياز
ياهاد الناس راه حنا فدولة الحق والقانون وهادشي ماخاص نسكتو عليه ، حيت كا يسيئ لسلامة المواطن وللسياحة ببلادنا
منين كا نقولوا بلادنا بلاد الحق إلا وحنا متأكدين أن الجميع سواسية أمام القانون ولله الحمد ، يعني لا حنا لا صاحب مطعم لي كاين ب “دار التونسي ” فوق القانون ، وللأسف هاد السيد كا يعتقد أنه فوق من القانون ، ويقدر يدير ما بغا في المطعم ديالو وكلوا يقين أنه هو مول الشي وما كاين اللي يحاسبوا
ولكن لا ثم لا ! هذا راه المغرب أ سيدي بلاد الحق والعدل ، الله يحفظ لينا بلادنا ، واللي دار الذنب يستاهل العقوبة ، وأنت يا لي كانتكلم عليك راك درتي الذنب وبالتالي أنت أهل لأخذ العقوبة و الإنذار
أنا مابقالي مانقول ، الحصول الله يحفظ بلادنا ، واللي بغا يسيئ ليها راه غادي نكونوا كاملين ضدوا ونقولوا ليه لا ثم لا هذا راه المغرب وكايبقا فوق الراس
